முன்னேறிய பாரதம் (கவிஞர் தனுசு)

பட்டொளி வீசிப் பறக்குது
பாரதத்துப் பெருமை!
பட்டென்று தோணுது
அந்தக்
காரணங்களின் அருமை!

நம்
இந்தியத் திருநாட்டில்
லஞ்சமில்லை
ஊழலில்லை
போர்ஜரியில்லை!
நம்புங்கள்
இன்னும் சொல்கிறேன்
கேளுங்கள்!

அரசியலும் மணக்குது
ஆட்சியும் மணக்குது
மக்களும் மாறி
காட்சியும் மாறியது!

வாரிசு அரசியல்
ஜாதி அரசியல்
மத அரசியல்
சந்தர்ப்பவாதம்
சகுனி வேலை
குறுக்கு வழி
இட ஒதுக்கீடு
யாவும் ஒழிந்தது!

தடையில்லா மின்சாரம்!
திடமான சாலைகள்!
எட்டிப் பறக்கா எரிபொருள்!
பஞ்சமில்லா குடிநீர்!

தரமான மருத்துவம்!
முறையான கட்டணம்!
இலவசக்கல்வி!
கல்விக்கேற்ற வேலை!

அடிதடி
இல்லா அரசியல்!
வெட்டு குத்து
இல்லா விளம்பரங்கள்!

கட்சிகளில் கொள்கைகளே
பிரதானம்!
குடும்பத்தாருக்கு இல்லை
அதில்
வருமானம்!

மக்களின் இதயங்களில்
ஹிமாலய சிம்மாசனம்!
அது மட்டுமே ஆள்பவரின்
மூச்சுக்காற்று!

முப்பொழுதும்
மெய்ப்பொருள் தேடும்
அப்பழுக்கில்லா ஆன்மீகம்!
எப்பொழுதோ
வெறுத்துவிட்ட
இலவசம் எனும் தேன்மாயம்!

பெண்ணழிவைச் சித்தரிக்கா
சின்னத்திரை!
சீரழிவைச் சித்தரிக்கா
பெரியதிரை!

வணங்கப்படும் சாலைவிதி !
மதிக்கப்படும் சகலவிதி!
தட்சணை கேட்கா வரண்கள்
தாம்பத்யம் மாறா வரங்கள்!

ஆலயங்கள் தோறும் தரிசனம்
இதயங்களில் ஊறும் கரிசனம்!
யாருக்குமில்லை அகங்காரம்
எல்லோருக்கும் ராஜ அலங்காரம்!

மதமெல்லாம் சம்மதம்
மனிதரெல்லாம் ஓர்குலம்!
பெண்ணுக்கு முன்னுரிமை
மற்றோர்க்கு சமஉரிமை!

கடமை கண்ணானது
உடமை பொதுவானது!
கண்ணியம் உயிரானது
புண்ணிய மண்ணானது!

நேர்மை
இங்கே கொடிபிடித்ததோ
நிமிர்ந்த பாரதம்
நடை போடுதோ?

இத்தனை பூரிப்பைத்தரும்
பாரதத்தால்
வியப்படைய வேண்டாமா?

வேண்டாம்!
இவையாவும்
நிஜத்தில் நடக்குமா தெரியவில்லை
அதனால்
என்
கவிதையிலாவது இருக்கட்டுமே
முன்னேறிய பாரதம்!!!!

-தனுசு-

காந்தி ஜெயந்தி! (கவிஞர் தனுசு)

காதி கட்டிய கிழவன்
இந்த
பெருங்கிழவன்!
இவன்
மோதி முட்ட பணிந்தான்
பரந்து கிடந்த பரங்கியன்!.

மூத்திர  சகதியில்
இருந்த இந்த மூத்த இனத்தை
சூத்திரம் செய்து
பத்திரம் செய்தவன்!

இந்த
ஊருக்கு உழைத்தவனை
உலகுக்கு சேர்த்தது
அவனது உண்மை!

அகிம்சை என்பதே
அவனின் எண்ணம்
அதை போதித்தான்
உலகம் புரியும் வண்ணம்!

உடைந்து கிடந்த இந்தியா
இடிந்து போன இந்தியர்
இகழ்ந்து பார்த்த உலகம்
இவனால்
திரும்பி பார்த்த அதிசயம்!

தடி ஊன்றிய தாத்தா
எங்களின்
தேசப்பிதா...
நீ ஜனனம் கண்ட இந்நாளில்
உன் மந்திரம் ஜபித்து மகிழ்கிறேம்
ஜெய்ஹிந்த்!
-தனுசு-

சொல்லத்தெரியாத ஆட்டம் (கவிஞர் தனுசு)

அன்றெல்லாம்
அவளை கானும் போது
ஆணந்தத்தில்
மனசுக்குள் குலவை இசை ஒலிக்கும்! இன்று
காணும் போது
உடையும் மனதின்
விம்மும் குரலை
கேட்கிறேன்!

ஒன்றாய்
ஓடியாடி விளையாடியபோது
அவள்
அடிவயிற்றைப் பிடித்து
சரிந்து உட்கார்ந்த நாளில்
ஓரக்கண்ணால் பார்க்க துவங்கிய
கண்ணாமூச்சி ஆட்டம்
இன்று அவளின்
மெட்டி பூட்டு மனவிழாவில்
முடிந்துபோனது!

இந்த ஆட்டம்
விழியில் களம் அமைத்தாலும்
இதய அரங்கம் ஊமையாகி போனதால்
அவளை
நான் மாலைசூட யோகமில்லை!

புதுமன வாழ்வை துவங்க
விடைபெற்றாள்
புது கணவனோடு!
நானும் விடை கொடுத்தேன்
வறண்டு போன விழியோடு!

தலை முடி கீற்றை
தள்ளும்போதும்
முந்தானை ஓரத்தை
பற்றும்போதும்
அந்த விரல் அசைவு
எதையோ சொல்லியது.

அவளின்
ஓரக்கண்ணின் பார்வை
மீண்டும் எட்டிப்பார்க
என் விழியில் ஈரம் முளைக்க
அதை விழிகளுக்குள்ளேயே
அடக்கம் செய்தேன்!

துனிந்தவனுக்கு துக்கமில்லை!
"நீ ஏன் துனியவில்லை"?
துனியாத எனக்கும் விடை கேட்கிறேன்!

வரையாத கோடுகள்
ஓவியம் ஆவதில்லை!
எழுதாத வார்த்தைகள்
கவிதை ஆவதில்லை!

கிள்ளாத பூவை
சூட முடியுமா?
அருந்தாமல் பாலை
சுவைக்க முடியுமா?

செல்லாத காசை
சேர்த்து என்ன பயன்?
சொல்லத்தெரியாத காதல்
செதிக்கி என்ன பயன்?

-தனுசு-

தவறிய அழைப்பு (கவிஞர் தனுசு)

உலகை மறந்து
உறக்கத்தில் இருந்தேன்
அலறி அடங்கியது கைப்பேசி!
துண்டானது
தூக்கம்!

அது
ஒருவரின் நினைவுறுத்தல்.
அது
நிறைவேற்ற மறந்த
நேற்றைய உறுதி மொழியின்
தொடர்சி.

எத்தனை வசதி!
எங்கோ இருக்கும் ஒருவர்
தவறிய செயலை நினைவுறுத்தி
கைபேசியை அலறவிட்டு சொல்கிறார்!

தூக்கத்தில் இருப்பினும்
ஒருவரின் அழைப்பை புரிந்து
விழித்துக்கொண்ட நான்....

விழி நிலையில் இருக்கையில் வரும்
என்
இன்னொருவரின்
என்னற்ற தவறிய அழைப்பை
ஒதுக்கிவிட்டு
ஒதுங்கிவிடுகிறேன்.

எத்தனை அலட்சியம்!
என்னுடனேயே இருக்கும் இன்னொருவர்
தவறிய செயலை நினைவுறுத்தி
சில
செய்திகள் மூலம் சொல்கிறார்.

ஒருவரின்  நினைவுறுத்தலுக்கு
தூக்கத்தை கலைக்கிறேன் ,
இன்னொருவரின் நினைவுறுத்தலை
தூக்கிப்போடுகிறேன்.

ஒருவர்
முக்கியமானவர்.
இன்னொருவர்
அலட்ச்சியத்துக்குள்ளானவர்.
ஏன் என்னிடம் இந்த பாகுபாடு?

ஒருவர் என்பவர்
நண்பர்!
இன்னொருவர் என்பவர்
மனசாட்சி!

நண்பன்
கொடுத்த பணி செய்யதவற
அழைப்பு
கைபேசியில் வந்தபோது துடித்தெழுந்த நான்...
மனசாட்சி விரும்பா
பணி செய்ய
அது
கண்டிக்கும் போதும்
அமைதியில் இருப்பதேன்?

நண்பன்
நேரில் வருவான்
மனசாட்சி
நேரில் வராது என்பதாலா?
-தனுசு-

பாரதத்தின் பொன்னோவியம் (கவிஞர் தனுசு)

 பாரதத்தின் பொன்னோவியம் (கவிஞர் தனுசு)
++++++++++++++++++++++++++++++++++++++++++++++++++
பொன்விழா கண்டு
பாரதம்
சாதனை புரிந்தது-இந்த
பொன்னோவியம் கண்டால்-அந்த
சாதனை புரிந்தது!

சாமியே....
ஆளும் ஆசாமியே....
புன்பட்ட மனதை
நான் எதைக்கொண்டு ஆற்ற?

பார்...
துள்ளி குதிக்கும் வயது
சுள்ளி சுமக்குது!
ஏடு தூக்கும் வயது
காடு பொறுக்குது!

கல்லும் முள்ளும்
காலுக்கு மெத்தையா?
உங்கள்
கண்ணும் காதும்
இன்னும் திறக்கவில்லையா?

விலை மதிப்பில்லாதது
விடலைப் பருவம்!
இவர்கள்
வீட்டில் உலை ஏறாததுக்கு
சாட்சி இந்த உருவம்!

தோள் கொடுக்கும் சமூகம்
தொலைந்து போனதா?
மீள் பதிவாய் உலகம்
மாறுகின்றதா?

இந்த
சவுக்கை தோப்பு சரித்திரம் மாறாமல்
வாள் அழிந்து
ஏவுகனை வந்து என்ன பயன்?
வான் முட்ட
கட்டடங்கள் முளைத்தும் என்ன பயன்?

இந்த
காட்டு பூச்சிகளை ஆள
ஒரு கோட்டை தேவையா?
இந்த
நாட்டு செடிகளை காக்க
கோட்டும் சூட்டும் தேவையா?

-தனுசு-

தனுசு கவிதை - தூரப்போய்விடும் நிலவு!

வகுப்பறை மூலம் எனக்கு அறிமுகமான ஒரு நண்பர் மற்றும் ஆற்றல் மிக்க கவிஞர் திரு. தனுசு அவர்கள்.

அவரது கவிதையை இங்கு குறிஞ்சித்திணையில் ஞாயிறு மலராக வெளியிடுவதில் உவகை அடைகிறேன்.

இனி மேடை, நண்பர் தனுசு வசம்!  

_____

தூரப்போய்விடும் நிலவு!  

இன்று ஒரு கவிதை எழுத வேண்டும்

எதைப்பற்றி எழுதலாம்?

"வழக்கம்போல்
என்னைப்பற்றியே எழுதிவிடு"
நிலா சொன்னாள்!

குளத்து நீரின்
அசையும் அலையில்
தெரியும் உன் முகம்
என்னை முத்தம் இட அழைக்கும்.
நானும்
நித்தம் ஒரு முத்தம் தருவேன்-ஆனால்

நேற்று வந்தேன்
நீ
கானவில்லை
எங்கே சென்றாய்?

சென்ற மாதமும்
ஒருமுறை
நீ
வரவில்லை
எங்கே சென்றாய்?

வானுலக நாகம் போல்
ஊர்ந்துக்கொன்டே இருக்கும் நீ
மாதம் ஒரு முறை
தோலுரிக்க போய்விடுகிறாயா?

இந்திர லோக
சுந்தரிகளோடு
நீ தினம் தினம் நடத்தும்
அழகிப்போட்டியால்
அசந்து
ஓய்வெடுக்கப் போய்விடுகிறாயா?

பதில் சொன்னாள்

நானும் பெண்தானே
அதனால்
மாதம் ஒருமுறை..........
தூரப்போய்விடுவேன் உனை விட்டு.

-தனுசு